امین کامل

حبہ خوتونہِ س63تۍ چھیہ اکثر أرنہِ مال تہِ چکاونہ یوان تہ دۅنونۍ مینہ تول کٔرتھ چھہ وننہ یوان زِ ٲرنہِ مال چھیہ حبہ خوتونہِ کھۅتہ پووا ہیو٘رے ٲسمژ۔ مگر حقیقت چھیہ یہ زِ أرنہِ مال ناوچ چھیہ نہ ژکہِ کانہہ کاشر گۅنماتھے ٲسمژ۔ یہ چھیہ بذاتی اکہِ غلط سونچن ترایہ ہنز پیداوار تہ أمس آیہ تیژ شہرت دِنہ تہ دیاونہ زِ وۅنۍ رود نہ اہندس آسنس کانہہ شکھے باقی۔

ا۷ اکتوبر ۸۸۹۱ آیہ میہ ریڈیو سرینگرہ پیٹھہ أرنہ مال، زبان تہ اسلوب عنوانس پیٹھ کتھ باتھ نشر کرنچ دعوت دِنہ۔ میہ کو٘ر امہِ ناوچ کانہہ گۅنمات آسنس پیٹھے بانہ انکار تہ یم زہ ژور بٲتھ أمس مٔرتھ چھکھ تھاوۍ متۍ، تمن ہیژم تنقیدی سام، ادہ یہندۍ تم چھہِ تہ تہندۍ۔ پروگرامکۍ پرڈیوسر میانۍ دوس موہن نراش صابن ونیام اہندِ نہ آسنکۍ لفظ کھینہ خاطرہ۔ مگر ییلہ نہ میہ مونس کتھ باتھ سپز تتھے پاٹھۍ نشر۔ تمہِ وزِ اوس میہ یہ اظہارے یوت کو٘رمت، دلیل ٲسمس نہ کانہہ تہِ دژمژ۔ وۅنۍ دمہِ اتھ مختصر پاٹھۍ نو٘م۔

کینژن بزرگ سازندرن پرژھ میہ اتھ متعلق۔ تمو وو٘ن زِ یہ ناو گو٘و تمن ریڈیو سٹیشن بننہ پتے کنن۔

لل دید تہ حبہ خوتون روز ہتہ بدیو ؤریو پیٹھہ گامن تہ سرین اندر لۅکٹین کیو بڈین زبان زد۔ مگر امۍ سند ناو نہ اوس کٲنسہِ بٹس تہ بٹنہِ ویو٘د، نہ کٲنسہِ مسلمانس تہ مسلماننہِ پتاہ۔ اوتار کرشن رہبر چھہ انشاپردازی کران لیکھان زِ لل دید ٲس خدا دوستی ہنز پش پناہی، حبہ خوتونہِ ٲس پادشاہی ڈکھس، مگر أرنہ مال ٲس اکھ عام زنانہ تہ عوامی سہارس پیٹھے روز زندہ۔ یہ عوام چھہ خیالی تہ سہارہ تہِ فرضی۔

بیربل کاچروچھہ پننس تواریخس اندر لل دیدِ تہ حبہ خوتونہِ ہنز کتھ کران ، مگر امۍ سند چھن نہ ناو تہِ ہیو٘تمت۔ہرگاہ یہ کانہہ شاعر آسہِ ہے، امۍ سند ذکر کرِ ہے سہ وارے تھُر کھٲرتھ تکیازِ یہ ٲسس پننی خاندانچ نۅش تہ خاندانی فخر کو٘ت تراوِ ہے۔ پیٹھہ چھہِ دپان أرنہِ مال مۅیہ ۰۰۸۱ ہس اندر۔ امہِ وزِ چھہ کاچرو ۵۲ وُہر اوسمت۔ اہندِ اتھہ آسہِ ہن کھیو٘مت چیو٘مت تہِ، ادہ آسہِ ہن نا امۍ سند کلامہ بوزمت تہ پو٘رمت۔
امۍ سنز گۅڈنچ ذکر چھیہ سری پرتاپ کالج میگزین ۶۳۹۱ سلور جوبلی نمبرس اندر میلان۔ اور کن پوو میہ اختر محی الدین صابن ۳۱ اگست ۸۷۹۱ ہس اندر اکھ چٹھۍ لیکھت ظن۔ غرض پرتاپ میگزین کس اتھ شمارس اندر یۅسہ گۅنمات جیالال کول سندس مضمونس اندر زنم لبان چھیہ تس چھہ آسان ناو رانی۔ لازما بٹہ پاٹھۍ وٲرویک ناو۔

امہ میگزین برونہہ شیہ ؤری ۱۳۹۱ ہس منز سپد بہار گلشن کشمیر ناوۍ کاشرین پنڈت فارسی شاعرن ہند اکھ تذکرہ دۅن جلدن اندر شایع۔ اتھ منز چھیہ لل دید تہ رۅپہ بھوانی تہِ شامل۔ مثالہِ کنہِ چھہ فارسی بدلہ تہند کاشر کلامہ آمت دِنہ۔ ہرگاہ أرنہ مال تہِ کانہہ ٲسمژ آسہِ ہے، سۅ گژھہِ ہے نہ امہِ کین ترتیب کارن تہ تمن اتھہ رو٘ٹ کرن والین مٔشتھ۔

امہِ پتہ نوِ وہرۍ ۰۴۹۱ ہس اندر چھہ محمد الدین فوق خواتین کشمیر ناوۍ اکھ کتاب لیکھان یتھ منز ارداہن ناماوار کاشرین زنانن ہنز ویژھنے دار ذکر چھیہ سپز مژ۔ یمن منز چھیہ لل دید، حبہ خوتون تہ رۅپہ دید شامل، مگر شریمتی رانی ہنز چھیہ نہ کنہِ ژھاے تہِ درینٹھۍ گژھان۔ سیز کتھ چھیہ زِ ۰۴۹۱ ہس تام تہِ اوس رانی ناو تہ گۅنہ مات پرتاپ میگزینس اندرے بند۔ ہرگاہ یہ کانہہ آسہِ ہے، نہ پھژِ ہے فوقس تہ تس اتھہ رو٘ٹ کرن وٲلس مہجورس۔

خواتین کشمیر پتہ پانژِ وہرۍ ۵۴۹۱ ہس اندر چھہ کول صاب اکھ لۅکٹ کتابہِ ہن کشمیری لرکس لیکھان۔ اتھ اندر چھہ پرتاپ میگزین کس رانی ناوس ژاس کٔرتھ اکھ نو٘و ناو مسز بھوانی داس، أرنہِ مال برونہہ کن انان۔ رانی کھۅتہ اکھ ژمہ وُن شاعرانہ ناو۔

عبدالاحد آزادن چھہ کشمیری زبان اور شاعری اندر أمس کہہِ لٹہِ مسز بھوانی داس تہ ژورِ لٹہِ أرنہ مال/ أرنی مال/ أرنی مالی ناو لیو٘کھمت۔ باسان چھہ امۍ چھہ انگریزی لفظ مسز سان کول صابسے نشہِ امۍ سند ناو تہ زان حاصل کرمژ۔ أرنہ مالہِ ہندس ناوس املایی ہشر نہ آسن چھہ گواہی دوان زِ ۶۴۹۱ ہس تام تہِ ییلہِ آزادنۍ کشمیری زبان اور شاعری مکمل سپز، اوس نہ یہ ناو برونہہ پو٘کمت۔